روح الغـــيّ
روح الغـــيّ بيمنع الهواء والضيّ…الحب غـــيّ والأكل غـــيّ وسياسة غـــيّ وكنيسة غـــيّ وجامع غـــيّ وسامع غـــيّ …
قادة غـــيّ وإبادة غـــيّ معجونين في الغـــيّ ومليانيين بالغـــيّ..رياضة وتموين وفن وتلوين وكله غـــيّ..
عارف ايه هو الغـــيّ ولا تحب اقولك ..هقولك:
لما الشعب يشوف النور ويحول عينه
لما يلاقي الرب يحرر ويدور على غيره
لما يرفسه ويهينه ويتمرمغ في خيره
غـــيّ
لما الأنسان تضيع كرامته
ورا لقمة ولحمة يبيع عظمته
لما حكومة تبهدلة عشان ياكل يجيب اخره
غـــيّ
لما يبقى الليمون أغلى من الناس
لما القلوب تكون من غير احساس
لما الشعب الاصيل من الاوغاد ينداس
لما الأنسان يعيش عيشة النسناس
غـــيّ
لما الفكر يحتار والعقل ينهار
ونمَوت اللي نفسه ياخد قرار
ونتهم اللي شايف انه صرصار
لما النبوة تبقى فضيحة وكشف أسرار
غـــيّ
لما الأعمى يبقى قائد المفتحين
والشاب نفسه يبقى كبير المسنين
والمؤمنين لا قاعدين ولا قايمين
والكل يطاطي ويحلف اليمين
غـــيّ
لما تبقى والحمدلله صايم
لاترش مياة وطول النهار نايم
وعلى فطار ونعمة بالله على السيجارة قايم
وبعد العشا مع الحريم والشر هايم
غـــيّ
لما نقول الحقيقة نبقى سلبيين
ولما نعلن فكر الله نبقى مش إيجابيين
ولما ابليس يبرطع فينا نقول متحاربيين
ولما الرب يحكم فينا نبقى غير مصليين
غـــيّ
لما المعزة تبقى جاموسة
لما المش يكون بسبوسة
لمل حسام يشبه نوسة
لما في اتفه المشاكل نبقى في حوسة
غـــيّ
لما الظلم يملا البلاد
وفي عز الصبح نشوف سواد
ويخلص منا القوت والزاد
والكنيسة تسمع الله وتمشي في عناد
غـــيّ
لما الحياة تبقى جوه القبور
لما الحاكم تختلط عليه الأمور
لما الوحش نشوفه امور
لما الناس تحور وتدور
غـــيّ
أه أقول ايه ولا أيه واسكت عن أيه واحكي ايه … غـــيّ يابلد ملهاش كبير ، حاميكي حراميكي وملك الشرير..يأسكِ بقى اساسك ودموع ولادك نهر مرير.
بكره يجيك يوم ياحق تاخد حقي وحق شعبي..تسترد عفيتي وترد لي أرضي ..بكره يابا تملك على الكل ..بكره يصبح فيكي كنيسة تنهي الذل .
شايف مش دلوقتي عارف انه لسة بدري لكن أكيد يامصر جايلك يوم تنسي فيه كل الهموم، وتعدي فيكي بحور النور وتصحي يامصر وأبطال فيكي تقوم،بكره يُعرف الرب في أرضنا ويملاها الحق بالكوم.
أندرو يونان
8-2010
